Daar is krokodille in die Zwavelpoortspruit.
Nee, dit is nie ’n
swak poging tot ’n voortydige
Aprilgek-grappie nie. Dis ’n feit soos ’n koei, of soos ’n krokodil, dan. En
die bewys daarvan lê veilig ‘in transito’
in ’n eendehok op ’n
Zwavelpoortplot; ’n uitgevrete Nyl
krokodil van by die twee meter lank.
Toe Charl van der Merwe laat in
verlede jaar ’n reuse vanghok begin
bou om die krokodille, wat maai
onder die vis in sy foreldam, te
vang, het almal vir hom gelag. “Ou Charl het
seker ’n likkewaan
of ’n groot baber
gesien,” het hulle gespot.
Die ?skerpkant? van Zwavelpoort se krokodil is iets waarmee ?n mens liewer nie wil slaags raak nie
Maar die Bronberg
se eie ‘Crocodile
van der Merwe’
het hom nie laat
afsit nie. Hy het sy “custom-made”
vanghok in die dam
gestel en in die
tweede week van
die nuwe jaar, ná
een byna katastrofiese,
mislukte
poging, het hy ta
veilig agter tralies
gehad.
Met die jong krokodil
wat verlede
week nog in sy
tydelike hok met ’n
diep eendedammetjie
gewag het om
oorgeplaas te
word na die veiligheid
van ’n bewaringsgebied,
is Charl nou op die
spoor van sy maat. En dan is berig
ontvang van nog twee krokodille in
Douw Venter se dam verder stroom
af.
Waar die krokodille nou skielik vandaan
kom, is ’n raaisel waaroor ’n
paar teorieë bestaan. Een daarvan is
dat sekere mense van Mooikloof,
verder stroom-op, klein krokodilletjies
as troeteldiere aangehou het
en toe die gediertes ongemaklik en
gevaarlik groot begin raak, hulle
met die vryheid van die Zwavelpoortspruit
beloon het.
’n Ander moontlikheid waaroor
bespiegel word, is dat die krokodille
op ’n manier van ’n krokodilboerdery
anderkant Bashewa ontsnap
het en in die spruit beland het.
Charl (Crocodile) van der Merwe
by die Zwavelpoort-dam waar
krokodille kom nesskop het
Lankal
Charl meen egter die reptiele kon
bes moontlik al lankal hier onder
hulle neuse nesgeskop het. Ses jaar
gelede kon hy sweer hy het ’n
krokodil in die spruit gesien, maar
omdat dit só verregaande geklink
het, het hy homself wysgemaak dat
dit seker maar ’n likkewaan was.’n Bietjie meer as ’n jaar gelede het
Billy le Roux, bestuurder by ’n groot
hardeware-onderneming, op ’n dag
forel in Charl se dam gevang toe hy
ook sy kop-op-’n-blok kon sit dat hy’n krokodil in die dam gesien het.
Dié keer het Charl ook soos die
ander skeptikusse gereken ou Billy
het seker maar ’n likkewaan gesien.
Maar dinge het regtig begin roer
toe die 13-jarige Dirk Stofberg ’n
bietjie meer as ’n maand gelede met’n vlot op die dam gevaar het. Die
dam lê gedeeltelik op sy pa, dr.
Tiaan Stofberg, se hoewe en
gedeeltelik op Charl se plot. Charl se
foreldam is net met ’n wal van dié
dam geskei. Dirk het grootoog kom
vertel dat ’n krokodil vlak teen die
vlot langs hom verby is.
Die gekamoefleerde vanghok lê gereed in die vlakwater
. |
Net twee van die baie werkers wat kom help het, was in die begin bereid om Morgan die vanghok te help uithaal |
Dis toe dat Charl se seun, Morgan,
besluit het om te gaan ondersoek
instel en met ’n kano kruis en dwarsoor die damme gery het. Sy verkenningstog
was suksesvol en sommer
gou het Morgan en sy vriende twee
krokodille raakgeloop.
Charl het besluit die nuwe dambewoners
het nou lank genoeg weggelê
aan sy forelle en aan die swartbaars
in Tiaan Stofberg se dam. Die
dieet van krokodil se kind bestaan
immers 70 persent uit vis. Verder
vreet hulle paddas, insekte, voëls
en as hulle groot genoeg is – wie
weet?
Die hok met sy vreesaanjaende inhoud word weggesleep |
Veilig in die versterkte vanghok
. |
Hok
Operasie hokbou is aangepak en
gou het ’n pasgemaakte krokodilvanghok
gereed gestaan, kompleet
met ’n meganisme wat die valhek
laat toeslaan as ou skubbe voor aan
die aas (goedgunstiglik verskaf deur
Kobus (Hoender) Jacobs) sou hap.
Die hok is gekamoefleer en in die
vlak waters langs die dam se oewer
gestel. En toe begin die wagtyd.
Elke oggend het Charl ’n draai
gemaak by die hok, maar telkens
was dit leeg. En toe, half drie een
oggend, was Morgan besig met sy
plotwagrit toe hy besluit om ’n draai
by die hok te gooi en daar sit
meneer, of mejuffrou, dalk. Morgan
het vir pa Charl by die opstal loop
haal en saam het hulle die hok met
vangs en al tot op die oewer
gesleep.
Die gevangene was glad nie
ingenome met sy lot nie. Hy het
woes gespook en toe met ’n aanloop
van die een punt van die hok
na die ander gestorm en ’n gat
dwars deur die valhek gehardloop.
Weer op vrye voet, het hy die pad
gevat terug water toe.
Die krokodil in sy tydelike tuiste voor hy na ?n bewaringsgebied verskuif is
Dit het volgens Charl ’n hele
gedoente afgegee. Fergus, die Van
der Merwes se vreeslose Jack
Russel, het nie op hom laat wag nie
en keffend al om die krokodil
gehardloop. Op ’n plaat klippe reg
langs die water het krokodil se kind
voor die blaffende Fergus vasgesteek.
Dis toe wat Charl vir Morgan net
betyds gekeer het en ’n moontlike
katastrofe in die kiem gesmoor het.
Want Morgan het gedink hy moet
op die krokodil se rug spring en
hom tot oorgawe stoei. Die krokodil
is toe soos blits weer die dam binne.
Die hok is verstewig en weer gestel
en ’n week later het die krokodil hom weer vasgeloop. Dié keer het
Charl hom op sy vroegoggendinspeksie
gekry en al wat ’n werker
is op Charl en al die bure se plotte
het kom help om die hok op ’n
bakkie te laai en die krokodil
veilig in sy tydelike tuiste te
vestig.
Oud
In Suid-Afrika word ’n volwasse
mannetjies krokodil tot vier meter
lank en die wyfie tot 2,5 meter. As
Zwavelpoort se krokodil ’n wyfie is,
kan sy amper volwasse wees en as
dit ’n mannetjie is, kan dit ses of
sewe jaar oud wees, sê die mense
wat weet.
Een manier om vas te stel watter
geslag ’n krokodil is, is glo om jou
vinger in sy agterent te druk en te
voel. Só dapper, sê Charl van der
Merwe, is hy nie. ’n Krokodil kan
70 jaar oud word in gevangenskap
en rondom 50 jaar in die natuur.
Die oudste Nyl krokodil bekend is
107 jaar oud.
Hoeveel krokodille nog in die
Zwavelpoortspruit bly is ’n ope
vraag, maar die feit dat hulle kan
oorleef en floreer dui daarop dat die
spruit “gesond” is. Charl sê as
iemand las van een het, of van
enige ander wilde gedierte, kan
hulle hom nader om dit aan te
keer.
Die lang vanghok wat Charl geprakseer het om ?n krokodil te kan vang |
Charl en Morgan van der Merwe by Fergus, die vreeslose Jack Russel wat eiehandig ?n krokodil wou aanvat |
|