Die Bronbergrif wes van die Zwavelpoortspruit is behoorlik gefynkam in ’n vee-operasie op 19 Februarie. ’n Paar geknipte heiningdrade is ontdek, daar is voetpaaie wat gereeld gebruik word en dopgehou sal moet word, maar die span kon nie slaapplekke of gesteelde goedere in die berg vind nie.

Verversings word geniet ná ’n taak welgedaan

Ongeveer 100 Conserv-lede van Mooiplaats, Zwavelpoort en Tiegerpoort (MZT) het om 5.30 vm reeds byeengekom om die berg tot bo-op die rif uit te klim waar hulle die ander vrywilligers ontmoet het.

’n Helikopter het die berg-vee operasie bygestaan

Groepe is opgedeel om die berg te fynkam vir enige tekens van menslike aktiwiteite. Een groep het wes beweeg na die steengroef wat aan Lynnwoodweg-verlenging grens; die ander groep oos tot by die Zwavelpoortspruit; en die laaste een het suid tot by die druiweplaas beweeg. ’n Helikopter het die berg-vee operasie bygestaan.

Oud en jonk het aan die vee-operasie deelgeneem
Foto’s: Petro Anderson

Die gemeenskap het by die eindpunt bymekaar gekom vir boereworsrolletjies, koeldrank ek ’n kuier saam met die bure.

Vir meer inligting oor die MZT Conserv-gemeenskap, bel vir Petro Anderson by 083-604-0074.