Stinkende riool uit die Mooikloofrif-ontwikkeling se rioolpompstasie hou ’n ernstige gesondheidsgevaar vir duisende mense in.

Die ontwikkeling se riool pla omliggende inwoners, ondernemings en selfs motoriste wat in Garstfonteinweg-verlenging verby ry, jare reeds.

Die probleem het einde Februarie vererger toe die pompstasie finaal ingegee het en rou riool langs Garstfonteinweg begin opdam het en onder Mooikloof Landgoed se mure deur tot in die Zwavelpoortspruit begin stroom het.

Die onbehandelde riool vloei met die Zwavelpoortspruit tot in die Pienaarsrivier en bedreig die gesondheid van duisende mense en diere.

Riool stroom onder die deure van die Mooikloofrif rioolpompstasie uit
Foto: Johan van der Merwe

Amptelike klagtes oor die pompstasie dateer terug na 2009. Een daarvan is ’n brief wat die eienaar van Newlands Tuinsentrum aan Kungwini Stadsraad geskryf het oor die riool wat in Desember 2009 in Garstfonteinweg afgeloop het en in Mooikloof se dam beland het.

Volgens ’n klagte gelê deur Patrick Cannell, inwoner in die gebied, lê die probleem nie by die munisipaliteit nie, maar by die landgoedontwikkelaars, M&T. Hy sê dat hy met die sekuriteitswag by Mooikloofrif se hek gepraat het en dat dié gesê het dat hy die probleem gerapporteer het, maar dat niks gebeur nie.

Mooikloofrif se landgoedbestuurder, Theo van Rensen het op 9 Maart aan Die Bronberger gesê dat hulle daagliks besig is om aan die probleem te werk. Sodra hulle die pompstasie reggemaak het, breek hy weer.

Theo sê dat die landgoedbestuur lankal aan Kungwini sit om die pompstasie reg te maak, maar blykbaar trek Kungwini-amptenare hul skouers op en sê dat die ontwikkelaars, M&T, nooit die pompstasie aan Kungwini oorhandig het nie. Dié rioolstasie is dus nie op hulle boekie nie, en is nie hulle probleem nie.

Die pompe binne-in die stasie kan deur die oop deure gesien word
Foto: Marinus Lindhout

Theo het self gereël dat die Mooikloofrif landgoedbestuur die pompstasie laat regmaak. Hy sê dat dit ironies genoeg Kungwini-kontrakteurs is wat nou deur die landgoed betaal word om aan die stasie werk. Hulle het vir Theo gesê dat die stasie verkeerd ontwerp is en sal aanhou breek. Dit sal heeltemal oorgedoen moet word.

Volgens Theo het Kungwini vir hom gesê het dat hulle die herontwerpte pompstasie sal oorneem. Hy wil nie graag ’n amptelike datum noem wanneer dit sal gebeur nie, maar het gesê dat dit dalk voor Die Bronberger se Maart verskyningsdatum kon wees.

Die rou riool beland in Mooikloof se waterstrome, die Zwavelpoortspruit en uiteindelik die Pienaarsrivier
Foto: Gert van der Walt

Op 10 Maart het PMJ Ramothwala, wat instaan as Kungwini munisipaliteit se direkteur van infrastruktuurdienste, egter ’n brief aan Theo geskryf waarin hy sê dat die munisipaliteit tyd nodig het om na te vors wie wettiglik vir die pompstasie verantwoordelik is.

In dié brief onderneem Ramothwala om Mooikloofrif se huiseienaarsvereniging die bedrag van R5,399.04 terug te betaal as ’n ondersoek sou bewys dat die probleem die munisipaliteit se verantwoordelikheid is.

Dit is die bedrag wat Pumptron gekwoteer het om ’n ondersoek te doen na die oorsaak van die probleme by die pompstasie om sodoende te probeer vasstel hoe om dit op te los.

’n Opdamming van riool langs Garstfonteinwegverlenging
Foto: Marinus Lindhout

Volgens wyk 2 raadslid, André van der Walt, is daar soortgelyke probleme en potensiële probleme by baie ander rioolstasies in Kungwini-wes.

Hy sê dat die Silver Stream rioolprobleem daagliks deur Kungwini amptenare gemonitor moet word, maar dat dit glo nie gebeur nie. Blykbaar gebeur dit nie, omdat meeste van Kungwini se senior bestuur in die departement verantwoordelik vir water en riool op siek- of studieverlof is. André sê dat die rou riool in die Zwavelpoortspruit beland en afloop om selfs in die Pienaarsrivier te beland.

In Februarie se uitgawe van Die Bronberger is berig dat rou riool van ’n onklaar suiweringstelsel by die Bluewater Creek-ontwikkeling glo in die Zwavelpoortspruit en in omgekrapte hoewe-eienaars se damme beland.

Die pad wat die rioolstorting deur Mooikloofrif se mure volg
Foto: Marinus Lindhout

Lewensgevaarlike e.coli bakteriese infeksie is by minstens een vrou wat langs die spruit woon, gevind. Bluewater Creek maak gebruik van ’n stelsel soortgelyk aan die Lilliputstelsel wat riool afbreek tot aanvaarde vlakke voor dit in die spruit vrygelaat word. In dié stadium is daar slegs enkele voltooide wonings by Bluewater Creek terwyl honderde huise van Mooikloofrif se onbehandelde riool stroomop in die spruit beland.