Bronbergers op agterpote oor nuwe opgaartenks Print E-mail
News - Aktueel
Friday, 24 June 2011 15:14
Untitled Document

Die mense van Tierpoort en Bashewa is geskok oor die nuwe bergingstenks wat reg onder hul neuse langs Garstfonteinweg-verlenging opgerig is, sonder dat hulle daarvan geweet het. Werkers op dié hoewe-perseel het vertel dat die installasie van vyf bogrondse brandstoftenks van 83 000 liter elk plus nog ’n petroltenk in die stoor deur die Garsfontein-gebaseerde Q4 Fuels gedoen word.

Q4 direkteur, Dreyer van Niekerk, het bevestig dat die bouery sy maatskappy se projek is. Op Die Bronberger se aanvanklike vrae oor ’n brandstof-opslagplaas het hy geantwoord dat ’n omgewingsimpakstudie wel gedoen is en deur die relevante owerhede goedgekeur is.

Volgens Dreyer is planne deur ’n meganiese ingenieur opgestel en ingedien by Kungwini en is dit goedgekeur. Hy sê dat die planne ook goedgekeur en afgeteken is deur die hoof van die brandweer.

Sy maatskappy het “werklik aan elke moontlike vereiste voldoen” sê Dreyer. “Ons het regtig baie geld, tyd en energie in hierdie projek ingesit. Ons sien onsself as professionele mense en sal nie so ’n projek aanpak en oprig as daar nie aan elke wetlike aspek voldoen is nie,” sê hy.

Die gebied waar dié bergingsfasiliteite opgerig is, het voor die munisipale verkiesing onder Kungwini geval. Amptenare van die Kungwini-raad kon egter nie bevestig dat daar hersonering vir industriële of bergingsdoeleindes hier plaasgevind het nie. Dit blyk asof die Tshwane Brandweer, onder wie dié hoewe nou val, nie bewus is van enige vorige besoeke aan dié perseel nie.

In ’n e-pos het Tshwane brandweerman, Willem Prinsloo, gesê dat sover hy verstaan, SASOL produkte aan Q4 lewer. Willem was van plan om SASOL voorlopige kennisgewing te gee om die produk-aflewering te staak.

’n Brandstof-opslagplaas hou ’n potensiële brandgevaar vir ’n omliggende gebied in weens die moontlikheid van ontploffings. In ’n hoewe gebied kan die gereelde veldbrande ’n ernstige impak op ’n brandstof-bergingsterrein hê.


Die Q4 tenks langs Garstfonteinweg-verlenging

Inligting
Die Bronberger het Q4 se Dreyer hierná gevra vir meer besonderhede oor die goedkeuringsdokumente van Kungwini of om besonderhede van die omgewingskonsultante wat die impakstudies en openbare deelnameproses behartig het, te verskaf.

Dreyer het toe gesê dat hy graag moontlike misverstande en foutiewe aannames uit die weg wil ruim en het verduidelik dat Q4 ’n maatskappy is wat by verskeie industrieë betrokke is. Hy het gesê dat slegs ’n gedeelte van die maatskappy bedrywig is in die petroleum industrie.

Hulle is ook ’n vervoeronderneming, dryf handel in die galvaniseringsindustrie en is betrokke in die industrie wat sonneblomolie herwin en dan die herwinde produkte aan die veevoermark verkoop.

“Die tenkplaas in Garstfonteinwegverlenging gaan gebruik word om sonneblomolie, wat ’n natuurlike olie is, te herwin asook om ons trokke wat deel is van ons vervoeronderneming te stoor,” het Dreyer gesê.

Hy het gesê dat Q4 in ’n baie mededingende mark handel dryf en dat hulle kompetisie duidelik reeds probeer om hulle te saboteer.


Die ingang vanuit Garstfontein-verlenging na die perseel

Voorheen
Dié Q4-terrein is in dieselfde omgewing waar MBT Petroleum voor heen ’n brandstof-opslagplaas wou oprig. Bashewa-inwoners was woedend oor die idee dat hul landelike omgewing in ’n gevaarlike industriële gebied omskep sou word waar mense en diere se gesondheid in gevaar gestel kan word deur brandstoflekkasies en die moontlikheid van ontploffings as veldbrande uitbreek.

Die planne vir die Bashewa brandstof-opslagplaas is egter in September 2009 laat vaar. Mills en Otten Omgewingskonsultante, wat die openbare deelnameproses vir dié projek behartig het, het belanghebbende partye laat weet dat die omgewingsimpakstudie vir die brandstof-opslagplaas gekanselleer is oor ernstige omgewingsbeperkings. Dié beperkings het aangedui dat die ontwikkeling van ’n brandstof-opslagplaas in daardie omgewing nie volhoubaar sal wees nie.

Mills en Otten het ook laat weet dat die bestuur van MBT Petroleum nie verantwoordelik gehou wou word vir die risiko van enige ernstige omgewingsimpakte nie. Volgens Johan Fouche, MBT se hoof uitvoerende beampte, is dié projek egter nie gekanselleer oor die resultate van die impakstudie nie, maar om die gemeenskap tegemoet te kom. Hy het gesê dat hy dit duidelik wou stel dat MBT omgee vir die gemeenskap.


Die bykans voltooide stoor op dieselfde perseel

Protes
Met MBT se aansoek is inwonersvergaderings gehou en ’n aanlyn protes-platform is geskep waar mense kon beswaar maak teen dié voorgestelde ontwikkeling. Die Magalies-Bronberg-Grondeienaarsvereniging (MBGV) is hierby betrek.

Op ’n navraag aan die MBGV oor die Q4-terrein het Mike Strange geantwoord dat die MBGV nie bewus was van enige openbare deelnameproses oor die Q4-projek nie. Hy het egter gesê hy vermoed dat soortgelyke gevalle nog aan die lig sal kom met Kungwini se oorskakeling na Tshwane.

Die Q4-perseel, by die ingangsbordjie Actebis 35c langs Garstfonteinweg-verlenging, val op die grens van die nuwe Tshwane wyke 101 en 91 wat nou onderskeidelik deur raadslede André van der Walt en Lex Middelberg verteenwoordig word.

Dié raadslede het ou Kungwiniamptenare gevra om op te kyk of so ’n projek goedgekeur is, maar kon nie bevestiging daarvan kry nie.

 

© 2020 Die/The Bronberger