Hy veg teen die naamwaansin PDF Print E-mail
News - Ou Poon se plotpraatjies
Friday, 22 July 2011 23:07
Untitled Document

“Ek weet nie of julle dit weet nie, maar eintlik is ek van inbors diep familievas en tradisievas, met ‘n gesonde skoot volkstrots stewig in my binneste vasgewortel,” sê Gert Mossie anderdag.

“Daarom dat die vrees my geleidelik begin beetpak het ná ek gehoor het ek gaan oupa word. Nee, ek is nie bang vir oupaword assulks nie. Ek sien tewens met blye afwagting uit na die koms van die kleinseun,” sê Gert.

Die vrees wat aan hom kom vreet het, is oor wat hulle die arme bloedjie gaan noem. Kleinseun se van gaan Van der Merwe wees – ‘n mooi en trotse Afrifranse van, sê Gert. Hy was vrek bang hulle maak soos só baie afgedwaaldes deesdae maak, en sit die allerverskriklikste volksvreemde naam voor daai Van der Merwe neer.

En erger nog, ‘n Ingelse een wat soos ‘n pitsweer of ‘n kakkerlak dwars op die ‘Van der Merwe’ sal loop sit vir die res van sy stomme kleinseun se lewe. Iets afgrysliks soos Bradley, Archibald, Dwayne, Griswold, Winston of Desmond van der Merwe. Behoede tog!

Maar was hy nou erg verlig toe die kinders laat weet hulle gaan nie die kind ‘n Ingelse naam gee nie, want hulle is nie Ingels nie, sê Gert. Hy sê die rieme het sommer op ‘n streep onner sy hart kom lê toe hy hoor hulle oorweeg skoonseun se oorle pa se name: ‘Wilhelm Petrus van der Merwe.’ Só hoort dit mos. Al hou hy nou nie juis veel van die voorletters, WP, nie, sê Gert.

So sit hy toe nog so salig en tevrede op sy amperse oupa-agterent en uitsien na die koms van klein Wilhelm Petrus van der Merwe, toe die verskriklikste tyding soos ‘n doodskoot in die nag toeslaan, sê Gert. Hulle het besluit, sê Gert se dogter, om die kind ‘Liam’ te noem. Liam van der Merwe! Bid jou dit aan - ‘n Ierse kakkerlak verstikkend gedrapeer oor sy stomme kleinkind se naam.

Dogter deel hom so ewe mee, sê Gert Mossie, dat hulle nie afgesien het van die plan om oupa Van der Merwe te vernoem nie. Hulle het die spulletjie net effens aangepas. As ‘n ou mos te lank oor ‘n enkele onderwerp tob, kan die grootste onsinnigheid vir jou naderhand klokheldere sin maak, sê Gert.

Dié ding werk só, sê Gert se dogter. Liam is afgelei van William, of Wilhelm, as jy dan wil. William, of Wilhelm, beteken eintlik Wil se ‘helmet’ of dan Willem se ‘helmut’. Haal nou die Ierse Will uit die prentjie uit en jy sit net met die helmet. Op Gallies noem jy ou Wilhelm se kopdeksel ‘n ‘liam’ – en siedaar: Liam van der Merwe, nes sy oupa!

Hy weet om in te meng in gewigtige sake soos kinnername, is met vuurspeel vlak langs die brose grashut van die goeie verhouding wat jy graag met jou kind wil handhaaf, sê Gert. Maar hy kon darem nie net so voor die volksvreemde swig nie. Hy moes iets doen om die waansin af te weer, verduidelik Gert.

Hy sê toe vir dogter, glo baie diplomaties, dat Liam vir hom regtig ‘n baie mooi naam is. Maar dis ‘n baie mooi Ierse naam en sover hy weet is daar nie ‘n leksel Ierse bloed iewers in een van die twee tersaaklike families teenwoordig nie.

Verdermeer, sê Gert vir sy dogter, is Liam ‘n baie gewilde Ierse naam. Seker elke tweede Iertjie wat gebore word, word Liam gedoop. Hy dink die ander is almal Paddy.

Eendag as ons ou kleintjie groot is, sal hy bes moontlik ‘n besoek aan Ierland bring, sê Gert. Vir ‘n regte Ier in Ierland, sê hy steeds baie diplomaties vir dogter, sou Liam van der Merwe seker net so vreemd klink as Koos O’ Driscoll of Gerhardus Murphy.

Hy weet nie of sy poging gaan vrugte dra nie. Hy glo amper nie, maar hy sal dan maar berusting vind daarin, dat ‘hierdie oupa’ probeer het om die goeie orde te handhaaf, sê Gert.

Maar, sê hy, gelukkig is dit nie alles verlore nie. ‘n Ou kan die kind altyd ‘n bynaam gee en dan kan hy vir almal wat wil hoor dit breedvoerig en logies uiteensit, waarom die knaap se naam Kêppies van der Merwe is.

 

© 2019 Die/The Bronberger