Het jy gehoor? / Have you heard? - Nov 2008 PDF Print E-mail
News - Het Jy Gehoor
Tuesday, 11 November 2008 05:25
Untitled Document

As jy maklik en sonder moeite wil uitvind of jy geregistreer is as kieser en waar jy moet gaan stem, gaan na die volgende webwerf en sleutel net jou ID nommer in. https://www.elections.org.za/amregister/amregister.aspx

xxxxx

Dié olifante laat hulle nie afsit deur ’n gebou nie. Die Mfuwe Lodge in die Suid Luangwa Nasionale Park in Zambia is onwetend op olifante se tradisionele roete na wilde mango-bome op die eiendom gebou. Die trop van ongeveer ’n dosyn olifante het vir die eerste vier weke van die ‘lodge’ se bestaan ten minste twee keer ’n dag deur die ontvangs-gebied geloop. Daarna het hul vir nog drie weke sporadies deur die gebou geloop. En dit sonder om ooit iets te breek.

xxxxx

Ou Hans, nee nie daai Hans nie, die ander een, sê hy het altyd gewonder hoekom die Aussies sulke bombastiese, kras mense is, totdat hy nou anderdag gedwing is om die land doer onder te besoek. Hans reken die antwoord lê in die manier waarop die Australiërs wakker word. Hier by ons, sê ou Hans, word jy wakker met die geluid van tortelduiwe en tiptolle in jou ore. In Australië word jy soggens saam met die son wreed wakker geskud met die geskel van kraaie in jou ore, sê hy. Die Aussies word dus elke oggend kras en bombasties wakker en eintlik moet ons die lot windbasse jammer kry, meen Hans.

xxxxx

Liewe Krismisvader,
Ek was baie soet vanjaar. Só soet dat ek gedink het ek mag maar ’n paar goedjies op my persentelys sit. Ek stuur die lysie vroegtydig, want die poskantoor hier by ons is nie juis vinnig nie. En ek sal dit maar ’n paar keer moet stuur, want jy weet nooit waar ’n pakkie of ’n brief beland as dit nie in die snippermandjie of in die poswerkers se sakke beland nie. Soos Kersvader seker weet, bly ek hier in die Bronberg en soos Kersvader ook weet is dit nie ’n plek vir sissies hierdie nie. Maar hier is my lysie – asseblief.

• Die eerste ding wat ek vra, is ’n bietjie krag. Nie die soort krag wat jy nodig het as ’n jongeling jou ma se kar en jou wil ‘pannelbeat’ omdat hy dink die kar en jy verdien dit nie, maar die soort krag wat ’n rekenaar en ’n koffieketel laat loop. Gee maar genoeg, veral op Maandagoggende, want dis wanneer Eskom en die stadsraad van Tswanetoria gewoonlik besluit dit is ons Bronbergers se beurt om kragteloos gelaat te word.

• ’n Paar eerlike amptenare vir ons plaaslike munisipaliteit sal baie waardeer word. En as dit nie te veel gevra is nie, sal ’n bietjie verstand vir daai eerlike amptenare ’n groot bonus wees. Ek weet nie hoeveel verstand daar in Kersvader se sak oor is nie, maar as daar is, sal dit sommer baie gaaf wees as die land se nuwe president en net ’n paar van sy ministers ook ’n bietjie daarvan kan kry.

• As Kersvader ’n bietjie spaar koper en yster in voorraad het, stuur dit asseblief tog vir die baie nuwe “skrêpmetalwinkels” hier in die Bronberggebied. Dan sal dit nie vir hulle nodig wees om by die voorheen benadeelde skrootmetaalhandelaars te koop nie en dan sal voorheen benadeeldes dalk nie ons boorgatkabels, telefoonkabels, droppers, hekke en die perde se suipbakke so gereeld stroop nie. Vir eers is dit al wat ek vra. Moet asseblief nie kwaad wees as ek nader aan Kersfees nog ’n lysie stuur nie. Ek was regtig baie soet hierdie jaar.

 

© 2019 Die/The Bronberger