Het jy gehoor? / Have you heard? - Jan 2009 PDF Print E-mail
News - Het Jy Gehoor
Monday, 26 January 2009 03:29
Untitled Document

Op 12 Desember om ongeveer 8 vm het Insp. van der Merwe en Insp. Nolte ’n oproep ontvang oor ’n gewapende roof te Oukraalmuur Donkerhoek. Twee verdagtes is met die ondersoek gearresteer en is later positief geïdentifiseer. Ander arrestasies is gou verwag. Dit word vermoed dat die twee verdagtes deel is van ’n bende wat die omgewing vir ’n geruime tyd geterroriseer het.

xxx

Een van die Bronberg-gebied se bekende ‘landmerke’, die Bafana Kontantwinkel langs Lynnwoodweg-verlenging, het ’n nuwe eienaar gekry. Henk Dreyer het dié gewilde winkel by Max Steenkamp (Van Zyl) oorgeneem. Max het groot planne met ’n perdeplek op haar en Basie se blyplot net ’n klipgooi van Bafana af. Deur die jare het Bafana ’n baken van die gebied geword as jy aan ’n vreemdeling wil pad verduidelik of as jy iemand op ’n sentrale punt wil ontmoet.

xxx

’n Groot span Bronbergers het op oujaar op Cornelis Cronjé se plot bymekaargekom om die nuwe jaar te verwelkom. Cornelis en sy Julia het bontgestaan om dit die grootmoeder van alle partytjies te maak. Mense is aangemoedig om tente staan te maak en ’n paar uiltjies te knip eerder as om die pad op die nuwe jaar se eerste dag aan te durf. Almal teenwoordig het vasgebyt tot goed ná middernag; die optimiste om die nuwe jaar met ope arms te verwelkom en die pessimiste om seker te maak die ou jaar gaan verby.

xxx

Jeug is wanneer jy toegelaat word om die ou jaar uit te sien. Middeljare is wanneer jy gedwing word om dit te doen.

xxx

Ons neem afskeid van Breytie Breytenbach wat oor die afgelope jare die gemeenskapsveiligheidsrubriek in Die Bronberger geskryf het. Breytie se laaste rubriek verskyn in dié Januarie-uitgawe. Danksy Breytie se rubriek het die gemeenskap meer bewus van veiligheidskwessies in ons omgewing geword. Dankie vir jou onbaatsugtige, harde werk, Breytie.

xxx

Vriend Walter sê hy sukkel nou al maande om sekere inligting en dokumente uit die provinsiale administrasie van Gauteng te kry. Walter meen die naam van die provinsie sal na ‘Teng’ verander moet word, want niks gebeur meer gau nie.

xxx

Gert Mossie meen ’n mens kan verwag dat voorvalle by sportbyeenkomste sal gebeur; soos toe die Aussie-toeskouer ’n laserlig in een van ons krieketspelers se oë geskyn het, sodat hy ’n bal misgevang het. Volgens Gert is die kanse goed dat daar iewers in ’n skare van derduisende mense ’n misbaksel of twee sal wees. Wat vir hom egter vreemd is, sê Gert, is dat daar gereeld onder die 11 Aussie-spelers op die veld ook ’n hele paar misbaksels is.

 

© 2019 Die/The Bronberger