Het jy gehoor? / Have you heard? - Jul 2009 PDF Print E-mail
News - Het Jy Gehoor
Saturday, 18 July 2009 00:53
Untitled Document

Ed’s Place in Garstfonteinweg-verlenging het op Vrydag 10 Julie ’n reuse heropeningspartytjie gehou. Karin Saffy het haar kuierplek vir ’n week of wat toegemaak om allerhande opknappings aan te bring. Die splinternuwe Ed’s Place het reeds 11 uur die Vrydagoggend oopgemaak met lewendige musiek, gratis ‘tapas’ happies en Fernando, hul befaamde Mosambiekse sjef, se Portugese disse.

xxx

Gert Mossie sê hy haat die winter. Maar sy oorle ma het hom geleer om altyd die positiewe in enige saak te soek. En toe gaan sit Gert Mossie en hy dink. Hy het vroegdag al begin dink aan iets positiefs wat die vervlakste winter vir hom bring en eers hier net voor skemer toe tref dit hom: Hy kan, sê Gert, aan net een ding dink wat in die winter se guns tel en dit is dat dit nie nodig is om ys by te gooi nie.

xxx

Daar is allerhande omwentelings by Bafana Kafee. Henk, Marie en Claire is nie meer met ons nie. Max en haar seun Ariel is weer terug agter die toonbank. Max is steeds besig om met perde te kompeteer in bykans al die dissiplines waarin meegeding kan word, maar sy sê dat sy haar 24-uur dag net beter sal moet beplan en rek om Bafana ook ingepas te kry.

xxx

Nog ’n paar Bronbergse pienkvoetjies het ’n welkome opwagting gemaak. Geluk aan Johan van British 4x4 en wederhelfte en ook aan gesoute oupa Nico en ouma Lynette van Kitty Hawk. Kosbaar, hoor.

xxx

’n Groepie vriende loop by ’n watergat in en sien daar is ’n nuwe kroegman agter die toonbank. Die eerste ou bestel ’n bier en die kroegman sê: “Sekerlik, dit sal een sent kos.” Die tweede ou bestel ’n dubbel brêndie-en-Coke en dit kos ook een sent. Hulle bestel kos, en alles kos een sent. Na ’n ruk vra een van die vriende waar die gewone eienaar/kroegman dan nou vandag is. “O,” sê die nuwe kroegman, “hy kuier by my vrou”. “En wat doen hy daar,” vra hulle. “Presies wat ek besig is om met sy besigheid te doen,” was die antwoord.

xxx

As jy gaan kyk na Kungwini se webtuiste en jy kliek op ‘latest news’ sal jy sien dat niks nuuts, volgens ons wyse stadsvaders, sedert 25 Maart 2009 gebeur het nie. Nou, kan dit dalk net betwyfel word dat die ou gesegde wat sê dat ‘geen nuus, goeie nuus is’ in hierdie geval van toepassing is.

xxx

’n Dag ten bate van CHOC Childhood Cancer Foundation, Pretoria, is onlangs by De Haven Oost op die ou Bronkhorstspruitpad gehou. Fondse wat ingesamel is, word gebruik tot die voordeel van kinders met kanker en lewensbedreigende bloedskiektes, en hul families. Choc se hulp aan sulke families begin reeds met diagnose, aangesien hulle die onvermydelike ontwrigting wat die kragtige en lang behandelings op die familielewe het, verstaan.

 

© 2019 Die/The Bronberger