Elize Havenga van plot 33, Rietfontein se lyk is op 3 Februarie langs ’n grondpad ’n paar honderd meter van haar huis af, gevind.

Elize Havenga
Foto: Eblockwatch

Dit nadat sy ongeveer’n dag lank vermis was. Elize is verkrag en met ’n stuk draad verwurg.‘n Nege-en-dertig-jarige plaaswerker van die omgewing is gearresteer en word verdink van die moord. Dit blyk asof Elize oorval is toe sy langs dié pad huis toe gestap het.

Dié afdraai uit Garstfonteinwegverlenging is ongeveer 15 km vanaf die Woodlands Boulevard winkelsentrum, feitlik langs Mangwanani Spa op die Rietfontein plotte wat grens aan Bashewa. Elize en haar man, Jan Adriaan Havenga, het blykbaar Saterdagoggend 2 Februarie ’n uitval gehad en Elize se broer, Danie Vrey, het haar gaan oplaai. Knap ’n paar minute nadat Danie haar opgelaai het, het sy hom gevra om terug te draai.

Sy het Danie gevra om haar by die grondpad wat uit Garstfonteinwegverlenging na hul plot lei, af te laai. Hy het aangeneem dat Elize die 2 km huis toe wou stap omdat sy tyd wou hê om te dink. Elize is om 2 nm op Saterdag 2 Februarie die laaste keer lewend gesien. Lede van die gemeenskap,
Eblockwatch en die polisie het sedert Saterdagaand die gebied gefynkam.

Jan Havenga en sy babadogtertjie, Arista, nege maande
Foto: Marupu Nkhumise, Beeld

Haar man het gesê dat sy nie sommer sou wegloop omdat sy vir hom kwaad was nie. Vriende het gesê dat sy nooit haar negemaande- oue babadogtertjie, Arista, sou agterlaat nie.

Elize se lyk is Sondagmiddag 3 Februarie gevind deur ’n lid van die Soweto honde-eenheid. Haar begrafnis was op 6 Februarie vanuit die NG Kerk Oosterlig.