Só lyk die splinternuwe brug wat by die drif oor die spruit by Hendrik Ver Loren van Themaat se druiweplaas gebou is. In Die Bronberger se Julieuitgawe het ons berig dat die langsame brugbouery met rukke en stote gevorder het deur die winter. Mense wat dié pad deur die drif gereeld gebruik, het duim vasgehou dat die Kungwini-kontrakteur die brug sou klaar bou voor die eerste reëns. Die brug staan nou, en inwoners hoop dat hy die Zwavelpoortspruit se berugte vloedwaters sal kan hanteer.