Hoe lank moet ons nog geduldig wees? PDF Print E-mail
News - Briewe
Friday, 26 March 2010 16:32
Untitled Document

Alta Espach van Rietfontein 366 JR skryf:
Op 18 November 2008 is my seun, Henk Albertyn, op sy plot waar hy voor sy rekenaar gesit het, deur die venster doodgeskiet. Niks is gesteel nie; om die waarheid te sê, die moordenaars was nie eens in die huis nie. Oor die hartseer en verlies wat daarop gevolg het, sal ek liewers nie eens ingaan nie. Baie mense wie vir hom baie lief was se lewens het drasties verander.

Intussen vermoed ek daar is nog geen ordentlike ondersoek deur die polisie, speurders of senior polisielede van Cullinanse Polisiestasie gedoen nie. Dit blyk asof belangrike inligting wat ek aan hulle verstrek het geïgnoreer word en ek word afgeskiet met: “Ja maar hoe sal ons dit bewys” of “daar was niks gesteel nie, dit sal moeilik wees om die skelms vas te trek” of “dit was ’n roof wat skeefgeloop het” of “as dit of dat gedoen moet word, moet ons eers ’n hofbevel kry” en dit lyk vir my alles is net te veel moeite.

’n Ander verskoning wat ons ook moet hoor is “ek is al dae in die hof”. Dit is nou een jaar en vier maande later. Nog steeds is daar blykbaar niks gedoen nie en die moordenaars loop steeds vry rond. Ons het belangrike inligting gedurende Desember aan die polisie gegee, en vandag, drie maande later, het hulle steeds niks daaromtrent gedoen nie.

Selfs ’n baie bekende speurder wie se hulp ek ingeroep het, het nie nou tyd om aan ons aandag te gee nie. “Ek is in die hof, julle moet geduldig wees.” Ek het ’n sterk vermoede wie die skuldige is, maar die speurders deel nie my siening nie. Moontlik te veel moeite om bewyse te kry? Derhalwe ignoreer hulle my. Ons moet geduldig wees. Hoe lank nog? Is 16 maande nie lank genoeg nie? Sou daar ’n spesiale taakmag aangestel gewees het as hy nie maar net Henk Albertyn van plot 125 Rietfontein 366 JR was nie?

Alta, jy is nie die enigste ma in die Bronberg-gebied wat wag dat haar seun se moord ondersoek moet word nie. Barbara Hiscock wag nou al langer as drie jaar. Haar seun, Brent, is op Oujaarsaand 2006 doodgeskiet in Zwavelpoort en sy kry geen terugvoer van die Boschkopse Polisiestasie oor die saak nie.-Red

 

© 2019 Die/The Bronberger