Die eeu se heel gewildste speelgoed vir kleingoed PDF Print E-mail
News - Artikels
Thursday, 09 December 2010 21:01
Untitled Document

Dié tyd van die jaar word kinderbriewe aan Kersvader geskryf en wenke word aan pa en ma gegee, wat immers die regte kontakte behoort te hê, oor watter speelgoed die hartjies bly sal maak. Oor die afgelope eeu het die aard van speelgoed kwaai verander. Videospeletjies, rekenaars, TV, selfone en ander digitale kinderoppassers het ouers oorval.

Tog het sekere ou staatmakers soos poppe, speelgoedkarretjies en bordspeletjies gewild gebly. Ons het na van die gewildste Kersgeskenke van elke nuwe dekade van die afgelope eeu gaan kyk.

Kewpie pop: Kerstyd, 1909/1910

Kewpie poppe was van die heel gewildste Kersgeskenke vir kinders van die vroeë 1900’s af en kry selfs vandag nog aftrek. Die poppie is gebaseer op ’n karikatuur in ’n tekenprentjie wat destyds in die ‘Ladies’ Home Journal’ verskyn het.

Die Hornby Trein: Kerstyd, 1919/1920

Dié modeltrein is deur Meccano gemaak en was wêreldwyd baie gewild onder seuntjies en hulle pa’s.

Duncan Yo-Yo: Kerstyd, 1929/1930

Die Amerikaanse entrepreneur, Donald Duncan, het daarvoor gesorg dat die klimtol een van die gewildste speelgoed van die 1920’s en 1930’s geword het. Die klimtol het die aanslag van die tyd weerstaan en peul steeds kort-kort in speelgoedwinkels uit.

Monopoly: 1939/1940

Dié beroemde bordspeletjie is in die 1930’s gepatenteer en is seker dié suksesvolste speletjie van sy aard in die geskiedenis. Hoeveel ure se plesier, maar ook argumente en familietwiste het dit nie deur die dekades veroorsaak nie?

LEGO: Kerstyd, 1949/1950

Lego is in die laat 1940’s vir die eerste keer aan die speelgoedmark voorgestel en het die verkope van Kersgeskenke vir kinders in 1949 oorheers. Die eerste Lego is ‘Automatic Binding Bricks’ genoem en die blokkies was van vier verskillende kleure.

Barbie Pop: Kerstyd 1959/1960

Barbie was verlede jaar presies 50 jaar oud en het sedert haar ontstaan in 1959 een van die heel gewildste Kersgeskenke tot nog toe geword.

James Bond Aston Martin: Kerstyd 1969/1970

Dié model Aston Martin DB5 is deur Corgi op die mark geplaas net voor vrystelling van die James Bond fliek, ‘Thunderball’, en het Corci se heel gewildste produk geword.

Trivial Pursuit: Kerstyd 1979/80

Nog ’n bordspeletjie wat wêreldwyd inslag gevind het is ‘Trivial Pursuit’. Hoewel dit veral deur grootmense gespeel word, is dit grootliks aan die begin vir kinders as Kersgeskenke aangekoop.

Rubik se kubus: Kerstyd, 1989/1990

Dié kopkrapper-speelding word beskou as dié beste verkoper ooit onder speelgoed. In Januarie 2009 is 350 miljoen kubusse reeds wêreldwyd verkoop.

Pokémon ruilkaarte: Kerstyd, 1999/2000

Dié versamelkaarte was ’n byproduk van ’n gewilde videospeletjie en was onmiddellik wêreldwyd ’n reuse sukses. Dit is die gewildste kaartspeletjie van sy aard nog.

Bakagun battle brawlers: Kerstyd 2009

’n Aksie-speelding wat sy oorsprong in ’n Oosterse TV-reeks het, het ook in Suid-Afrika soos soetkoek verkoop.

Kerstyd 2010

Dié afstandbeheerde Sjinese apie het die Westerse wêreld behoorlik ingeneem. In Brittanje en Amerika word voorspel dat Dave by verre die gewildste Kersgeskenk sal wees. Twee van Pretoria se takke van Suid-Afrika se grootste speelgoedwinkelgroep het nie geweet waarvan ons praat toe Die Bronberger wou hoor of Dave hier beskikbaar is nie.

 

© 2019 Die/The Bronberger